اكبر موسوعة شعر حلمنتيشى فى المواقع السودانية

ارجوك يا اماه يا محبوبتي....
لا تهبشيها عصيدتي....
مدي الي بمقبض المفراك...
و حبيبة من ويكة مدقوقة ...
في الفندك...
ارجوك يا اماه يامحبوبتي...
ان مرة جاءؤا اليك وخبروك ....
بأنني...انا حامل للحلة..
لا تجزعي...لا تجزعي...
بل زغردي....بل كبري...وتهللي....
ماذا اعوس هنا في غربتي...
غير العصيدة...وملاح الويكة...
فالبوش غالي والرغيف قليل...
اماه ان اخبرتك لا تحزني....
اني اعيش هنا في حالة من دبرسة...
عارفاني اني لا اطيق التربسة ..
اني اميل الي حياة الفرفشة والدردشة...
او تذكرين عزيزتي اني ....
احب الركلسة...
اقضي حياتي متكلا اتونس...
اليوم افرك ويكتي وعصيدتي...
في حلتي...
واذا الغبار احل يوما ضيفنا ..
فلغرفتي سأنضف..وأكنس...
عفوا انا ما كنت يوما ...
ربة للمنزل ...
لكننا في ابحراز سنفعل...
سنعوس رغم المستحيل ....
وسنأكل العدس المدنكل ..
بعد ان تمسي الوكائك ..
في الفطور مسيخة...
وندكه في الصحن بوشا...
بعد ان يضحي الرغيف قليل...
اماه كم اشتاق...
بل متشوق...لطبيخك...
فهنا مللنا اكلنا للويكة ..
انّا اذا غيرنا اكلنا للاحسن...
لاتحسبيها للافضل..
فعصيدة منها اليها سكر..
ان كان يوم العيد فيه نحرنا...
سيكون فيه خروفنا...
عصيدة باللبن ...
اماه كم اشتاق كم للشاي...
شاي الصباح مدنكلا باللبن...
فهنا تعزز..واستفز ظروفنا..
في الغربة...
والكل يعلم حالنا بالفلس...
واذا استلمت الراية ...
من اشرف..او سامي...
او زاهر وعجوبة او غازي...
لا تجزعي لا تحزني...
انا هنا في جنة الفردوس...
انا سلكنا دربنا للزحف...
نحو شهادة ...
باكر اجيئك غانما...
ومحملا بشهادتي....
في علم صنع الويكة ...
اوشين ...علم عصائدي..
ومن ابحراز اجيئك ...
باكر انا بشهادتي..
اماه لا لاتحزني ...
لا تجزعي..
بل زغردي بل كبري و تهللي ....
هزي الي بمقبض المفراك...
باكر اجيئك غانما ومحملا بشهادتي ...
في علم صنع الويكة وزراعتي...
اماه لا لا تحزني لاتجزعي...

[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذا الرابط]

يا زول تعال شوف الخشيم
ممطوط تقول جاريه سيل
ولة الكضوم منفوخة كيف
منفوشة زي طشت الغسيل
وده كلو كوم ولة الكرش
تحلف تقول بالعالا فيل
وعيونا داقشات الغزال
كافتات شمال من غير دليل
والصوت كمان ما شفتو كيف
صوتاً خمير زي العويل
ووبّاً علي من شفتا
صاج العواسة اخير عديل
ولة الحبوب الفي الوشيش
طربيزة عِن حدّاد بخيل
ايديها واصلات الارض
ممدودة زي حبل الغسيل

ولة الخشيم الما خشيم
ده كبير وشين وش قندران
والنخرة ممطوطة التقول
خور في الخريف سايل كمان
ورجولا سكاكات عديل
لا لحمة فيها تقول أضان
والراس مدوقس فولة بس
فاضي ومحفر وقمله بان

الشاعر مازن هاشم الجمال

ضلافينك جميلة وكت
تعفصي طين قليبي حنان
وتقدلي زي سخل منداح
بسابق في ضنيبو الكان
بهش ضبان ثقيل متلم
ويرقص لما تمشي كمان
عيونك سر جمالا قضا
ملايس خافي حوصاً بان
حلات اضنينك النازلات
وواصلة حليقك الضهبان
وصوتك ميييع بهرني كمان
بيسحر كل تيوس الضان

في الليل داك
وفي نفس المكان الكان
بفتفت فيه كل الهم
واسوق أفراح بدل أحزان
أجيبا معاي من الحبان
ودفتر لف من الدكان
واجيب بالباقي منو لبان
واصنقر في الأرض وانجم
ولما ألف بكون فرحان
بكون هيمان
بكون خرمان
أفت الحمرا في الورقة
وأكب من فوقا سر الجان
ولي صباعي الصغير أمدغ
وأطلّع للبذر بحنان
وامسك للوريقة الحلوة
وأبدا ألف بخور الجان
وبلساني المرطب ديمة
ألحسا بالعرض بأمان
وأبرم للطريف الفوق
واشمّها زي حريف إدمان
واختّها في الخشيم المر
سواد شلوفته زي قطران
وكبريتي الملهلبة نارا
أشعل عودا زي بركان
وامرّر للهب بشويش
سجارة الدوكو دايرة حنان
ولنفيس البداية أجر
وألحقو بالتني بجنان
ويتقل راسي زي صخرة
ويبرد حيلي زي تعبان
واحس برجولي زي مافي
وأهبش فيها زي مرضان
وأبدا في دور من السرحان
وواصل في السجارة شراب
واشوف حاجات عجيبة كمان
أشوف غنماية في فستان
ممكيجة في خشيما لبان
ومرة كمان أشوفلي بحر
وفيه حسان بكل ألوان
وضحكات صاخبة منداحة
والكل بي فرح طربان
وأوصل بالسجارة هناك
محل شوشاوتا وازدان
وازغرت بيها زي نسوان
واجرجر للرجول أوقف
واهبش في الارض حفيان
نعالي نسيته وين ختيته
من جيت للمكان خرمان
وأمسك دربي زي برجل
أدوّر في المشي السكران
وأوصل بيتنا دربه أمان
واشيل الجك وفوت للزير
ده ريقي نشف نشاف البان
واقرطع للجكيك كله
وبرضي كمان بكون عطشان
وأفتح للمواسير سيل
وكل دقيقة بمشي كمان
وفي الآخر سريري حنين
يشيلني نعاس ونوم غمران

شوق للنيل
وشجر نخيل
وشمساً باردة وراه تميل
وأرضاً طيبة وطينا وحيل
وشجر النيم الضله ضليل
وغصن البان فرحان بيميل
شوق لليل
وسمر الليل
وشلة ونسة مساهرة الليل
في ضو القمرة الكاشفة الليل
في الرملة الباردة الشاربة النيل
وفي نص الونسة الشاقة الليل
نسمع صوت غناوي الليل
ونتنفس نسايم الليل ..
شوق للناس
وطيبة الناس
الصافية قلوبا بدون وسواس
والعامرة قلوبا بالإحساس
والطاهرة قلوبا بحب الناس
والماخدة الطيبة وجوب وأساس

يا بلدي
تهنا هناك واتعذبنا في بُعدك
شربنا المر وعشنا الذل بعيد عنك
صبرنا كتير نفتش في وطن بَعدك
يكمل لينا من نقصا بدر منك
محال لكن نلاقي هدفنا غير عندك
أو صدراً يسعنا جميعنا غير صدرك
نلف نرجع نقول إنك..
عزيز وانحنا اتعذبنا في بُعدك

منو القال للسحاب إتلم
واهطل يا مطر ألوان
وأروي سهول غشاها عطش
واسقى غصون شجرة البان
شجرة البان دي أصل الخير
جزورا عميقة في الوديان
وكلها حب ولامة كمان
حواليها الزهور بحنان
حنان امي حنان مليان
وقلبها بالفرح رويان
شجرة البان دي ما امي
ومشتاق ليها يا انسان
والاشواق بسوقا سحاب
وتهطل بالدموع في البان
وأخواني الصغار ازهار
مشبعة بي نداها حنان
بجيك يا يمة اصبري لي
بجيك اشبِع قليبي امان

منو القال للشمس تطلع
تغازل بي خيوتا زهور
تمد النور عشان يوصل
يغطي سهول ويدفي بحور
شمس ما حارة حراقة
شمس دفاية مشتاقة
وحبها للجميع مجهور
شمس بالخير تنادييلنا
ووصفها بالجمال زي حور
وحور من جنة ضواية
بتلمع في ضلام مسحور
شمس تبعد ضلام الليل
وتنصر كل حزين مجبور

منو القال للدموع تنزل
تبل وجه الفرح احزان
وتعصر في القليب اهات
بتطلع حارة من وجدان
ما دموع الفرح حلوة
وطعمها بالسعادة أمان
واما طعم دموع الحزن
مرة ومالحة من الكان
لكن في النهاية دموع
وكلها للقلب سيان

يا دنيا ليه دايما كده
كل الظروف متمردة
حظ الشقي الما خلّا باب
في الدنيا لافي مُحّددة
لا طال حلم لا طال نصيب
بقراية كوم متعددة

يا دنيا ليه دايما جري
ما تقيفي مرة واصبري
مستعجلة ولاحقة الشنو
ما كوم حصادك مُهتري
والفايدة مبلوعة في كروش
تاجر ضلال أو مفتري

يا دنيا ليه دايما عذاب
أسفار بعيدة واغتراب
كان فيها ايه لو خير بلد
بالعدل مقسوم بالحساب
ما الخير كتير ما بدور سفر
وضياع عمر محسوب سراب

يا دنيا ليه دايما حزن
دايما دموع وقلوب تئن
وسواد كثيف دخان ألم
نابع من القلب السِخِن
وغراب كلام بوم الفقر
ساكن معشعش في البدن

يا دنيا ليه دايما ضلام
وغيوم مكدسة ليلا دام
وسكون عجيب مبتور لسان
محروم بيهمس بالكلام
وعيون مقدقدة بالسهر
عميانة تسبح في الظلام

يا دنيا ليه ما فيك أمان
والظلم آمر في الزمان
والخوف دخل نخر العضم
والسوس ده هو الندل الجبان
والروح مُعّذبة بالسكوت
سِكّين عذاب وسياط هوان

يا دنيا ليه دايما كلام

في ليل مسدول كاسيه سواد
في غربة حزينة وناسها بعاد
وفي ظل ممدود من غير أبعاد
إمكن ظل قمراً ليه ميعاد
ممدود بين شجر أغصانه سواد
لمحت شبح
أو إمكن ضل
سارح في الليل تائه مُهمل
قرّبت قريب إمكن أندلّ
عن صورة توضح لي أكمل
سمعت نحيب بي صوت مذلول
مخلوط بأنين ممزوج بالذُل
ولمحت دموع سايلة بتهطل
وقفت قصادها بديت أسأل
عن سر مكتوم في جوف مُهملّ
رفعت للرأس بانت أجمل
لمحت عيونها
عيون أمي
وهي وين أمي !!
بعيدة هناك تسأل مني
كل طيراً جاي تسألوا عني
كيفن أمسيت في يوم مقضي
حسيت بدموع غصّت حلقي
ونار الشوق حرقت قلبي
دي ما أمي !!
وإمكن أمي ..
شن جاب أمي في ليل بعدي
أكيد بحلم بعيون أمي
أكيد بحلم أضمّ أمي
أكيد بحلم بي حضن أمي
صحيت من نومي مشيت أجري
كايس لو أسمع صوت أمي
بديت أضرب
تلفون بيرن وقليبي يئنّ
لو أمي ترد وعليّ تحن
وسمعت الصوت ودموعي جرنّ
حليل أمي ..

[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذا الرابط]

يا جزمتي
يا جزمتي الشالك يطير
يبلوه بي مرضا خطير
بي الايدز بي شر مستطير
يا جزمتي الشالك يقع
في بركة في يوماً مطير
لا يضوق سعادة ولافرح
لا باسطة لا شاي بي فطير
يا جزمتي الشالك يموت
في السكة بي نطحة عتوت
بي رفسة تتفطس مصارينو التجوط
يا جزمتي الشالك يقع
في السكة في اعفن ترع
تتكسر الرجلين وتنحل الضلع
واخر ختامو يكون صرع

[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذا الرابط]

تمساح توتي
Last week I was setting
جنب ال river
Smoking a cigarette
والـــدمــــــاغ مــــتــــكــيـفــة
Watching the moon
و كراعي holding خـالــفــا
I saw a man
شــــابـــــــا صـــغــــيــــر
But he was
مـــتــــقــــنـــــــدفــــــا
Driving a car
وال car Corolla
مــــــكـــــنـــــدشـــــــا
He stop it ال جنب river
Start clean it and then quickly
يـــــنـــــشـــــفـــــــــا
When he stop it جنب ال river
تــمــســاح كــــبـــــيـــر ظــــهـــــر
Swim to it
وراح خــــاتـــــــــفـــــا
The man كـــورك بصوت clear
What did you do
تـمــســـاح كـــبــــيـــــر؟
Why did you leave my
ريـــــــحـــــة طــــــيــــر؟
هـــنـــــا التـــمـــســـاح
Appear
وقـــال أنـــــــا الـتـمـسـاح و
Someone like to call me a Crocodile
I am the king of this river
وتــحـت الــكــبــري always صايل always جايل
Do you think the Corolla back & so you
قـــــــــايـــــــــل؟
This is your
بُــــــعــــــــــد
So
لو عدت back by this مزاحي
Or if you just move by this
نـــــــواحــــــــــي
I'll أصـــيــبـك بـالـجــراحــي
ودي قــــوّة عــــــيـــــن
It is better to you
تــخـــلـــيــــك صــــاحــــي

[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذا الرابط]

أقطعي
أقطعي يا الجنيتي على القطع
كمبيوترك ما بعرف الجمع
اقطعي خلينا نبكي بالدمع
اقطعي تكتر مصانع الشمع
وينقص رصيد ناس الضرائب
والحبايب ويا كهارب اقطعي
****
أسلاكك بس بيت عنكبوت
والبهبشك ما اظن يموت
أقطعي خليهن يبكن البنوت
وشًوفي الناس العجائب
يا كهارب اقطعي
***
أقطعي وخلينا بس نبقى الكبش
اقطعي اسعارك ما بتنهبش
اقطعي بنوًر بيوتنا بالشمش
وننفك منك يا ام مقالب
ويا كهارب اقطعي
****
اقطعي يا ربة الحسن والجمال
يا قاسية بكيتي الرجال
بتصيدي في الناس بالنبال
تعيشيهم في مقالب
وتخربشيهم بالمخالب
ويا كهارب اقطعي
***
فشلتي ما قدرت واصلت المسيرة
إيه فائدة البحر الدميرة
والكوابل والعواميد الكثيرة
دللوها واملوا بقروشها الخزائن
ورجًعوا الناس للرتاين
وينفكوا من كل المشاكل والمصاعب
والمتاعب يا كهارب اقطعي
***
أقطعي انت احوالك عجيبة
أقطعي ملينا عيشتنا الرتيبة
أقطعي ضلمي المدن الكئيبة
وتقرًص الناس العقارب
والدبايب ويا كهارب اقطعي
***

[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذا الرابط]

الزمن الضائع
الزمن الضائع
متين يا الله ألم الفكه
أجيب الشيلة واسوي الشبكه
وأمي تزغرد بي طول صوتها
وأنا مبسوط وظابط الشكة
هدومي معطنة بالأرياح
ريحة الخمرة وريحة الدلكة
واطبع للعيزومة كروت
حاشاها الما زي كرت البنزين
جميله زاهية في ورق التوت
وتحت الإمضاء مشكورين
لأنها لحظة ما بتفوت
وإلا تكونوا مبسوطين
ويجوا الأولاد بوجوهاً نادية
يقشوا الفسحة الواسعة وهادية
نرًكب فيها الصيونات
ونعمل حفلة بود البادية
ولازمن حفلة تكون صباحي
أشفي غليلي وأداوي جراحي
من زمن العذابة الأغبر
السًود عيشتي وزاد لنواحي
أفك القيد من قلبي وأغني
حبيب الروح وغني يا صاحي
وفي العصرية نمرق سيرة
خلوق منتظمة ماشة مسيرة
زي صف دكانأً ناصية
فيه سجاير بالتسعيرة
بناتنا يغنن مبسوطات
دور بينا البلد ده
يلفن يدورن العربات
ولمن أصل بالسيف اتقدم
زي الفارس ماشي ملجم
وشي بينضح لمعه ونضرة
قميصي نضيف وماه مجلبط
بملاح خدره
أهز في البنوت بي سيفي
وابخبخ فيهن لبن البدرة
وفجأة يدق صوت الدلوكة
وتبقى الناس بالجد مربوكة
واحدة تصفق واحدة تزغرد
وواحدةتلوك في لبان بازوكة
جابوا عروسي وبدت الوقفة
سرحت بعيد في حق القفة
جابت قون بي رقة وخفة
ما اتجرست كلا وحاشا
الا هناك واقفين شماشة
قالوا اكيد شارب حرباشة
زعلت شديد وغلبني اللعب
لانو كلامن كلو كضب
قاموا اصحابي بصوت عالي
يا عبد الله اطلع بره إشاعة إشاعة
وحتماً يوم لي أمك عايد
قونها حقيقي ما اوف صايد
صوت أصحابي أثر فوقي
بحركة ذكية جبت القون
وانا والحلوة بقينا درون
وفجأة أضفت الهدف الثاني
وغمر الساحة فرح رباني
مرقوا اصحابي يكوركوا ويهتفوا
فاتوا الفسحة وسدوا الشارع
صوتهم طاغي ظاهر وطالع
يا عبد الله هايل ورايع
جبت القون في الزمن الضايع

اتململت في القعدة
واتشهدت مليون مرّة
بخاف المحنة والزرة
لساني خفيف وقلبي رهيف
واكان قالت صباح الخير اقّرب اقيف
براي يوم داك رميت نفسي
طردت الخوف ده من قلبي
سألت السمحة مخطوبة ؟؟
قالت لي : لا ..لكن لييه ؟؟
سمعت قولة لييه تقول بندق
وقلبي الماسكو بين يدي قنّب يدق
ريقي نشف وحلقي يطق
شعرت القول تقول في حُق
واتململت في القعدة
بدور امرق
كان تاني سألتني لييه؟؟
كلامي راسو طار منو
واتقفل عقلي واتدبس
اتاري الخوف ده ما بندس
قريت الحمدو عشرين مرة
حتي قدرت اتنفس
اخوها قال ليها : ساكت بس !!
وعاد السمحة قالت كعبة
وانا السجمان رقم سبعة
الحر ..حسيت بالبرد
تقول قرفان مرق في البر
حاولت اقول باي باي
لقيت خشمي بي كماشة ما بنفك

واحدة سمينة دايره صاحبنا يحبها بالقوة وكتب فيها..
ريدى ليك يا أم شداق
يقلب اللورى فى الدقاق
ولما أغلط وأقول مشتاق
عيونك جب تكرب جوه فى عيونى
تبهدلنى وتبشتنى
وتجقمت فى مصارينى
وأتوكل وأقول آآآآآآآآى بريدك
بريدك ياسجم خشمى
يا أم إيدا قدر جسمى
يا أم ريدا بعج بطنى
=====
أريدك كيف
وكيف يا ناس أريد فيل
يحلنى الله يالبرميل

تأليف : مشرور راجي الدّفار!
حاجة عجيبة ودنيا تنسّي
ناس اغتربت تمشي المانيا
تمشي اليابان ونيوجيرسي
حاجة عجيبة وجات بالعكس
من الصين وللسودان
الجكس اغترب وباع الفيكس
واحدين قالوا جونا هنا
لأنو هناك حرارة الطقس
واحد قال بكين بالنص
للسوق العربي رماهم بوكس
وميه الميه بايركس
وبايركسنا كمان بايركس
السودان ضاع وضح النهار
من غير ما لبس
والشوارع دقداق تفتل دركسون
وتحل جربوكس
ومن الصحافة زلط وللخرطوم بالعكس
ثقيف مشرور وتهتز زي البترول
وما يفضالك كرسي
نهارك ضاع من تصبح لامن تمسي
ركشه هنا وركشه هناك وللصالح العام
أحالوا التكسي ..
الدفار جاك وهاك يا كوداك
تصل عرقان وقميصك وسخان
وحالتك يخسي
راسك زي سخّان يغلي غليان
وما يساوي الفلس

تأليف أحمد الشيخ : لما شفتك
لما شفتك
لما شفتك قلبي كان ناصع نضيف
زي الطيور الراحلة في زمن الخريف
عشت متألم وما قادر أقيف
زي زي مشرور وحيد
مستني باصات الجريف
أنا الكيشة صًدقت إدعائك
يوم قلتي لي دمك خفيف
وخدعني بوخ نظرات عيونك
مليانة بالكحل الظريف
قمت شلت الكيس من ايدك
ووقفت في صف الرغيف
دافعت ليك وسط الخلوق
عشان تقولي ولد حريف
واديتك العيش بابتسامة
نابعة من قلبي الرهيف وبعد ما شلتي العيش
نسيتيني ومشيتي بعيد
وانا المشدوه أعاين فيك
زي إقليمي جاي جديد
تاه في زحمة الخرطوم
وشاف الناس شمال وصعيد
ما تنبسطي يا حلوة
بعد نكرانك المعروف
أصلو الحي مصيرو يلاقي
ياما بيشوف
واصلو الناس حياتها ظروف
ويوم بلقاك في ورطة
لانو بلدنا كلو صفوف

طالبة عريس
فتاة بجامعة القاهرة الفرع
لي إيــدينا بنــــــــرفع *** والعازب كلو بيســــــــمع
نفوسنا كتير مشــتاقة *** للراعي دوام نتضـــــــــرع
شعارنا عريس متواضع *** ياخي ياقدر اسمع أجمع
نحن البايرات في لهفة *** والعمـــــــــر ولـــي وودع
نحن مساكين ياجماعة *** وللجنة دوام نتطــــــــــلع
لو واحد قام وأتقــــــدم *** في لحظة نلبي ونسمع
***
بلاش عربيــــة خصوصي *** مالو الكداري دا هســـع
بلاش من شبكة وشيلة *** بي أبســط حاجة بنقنع
البيت ماشــــــرط عمارة *** دي مظاهر ساكت تخدع
لي جنة نضيرة نحــــــول *** البيـــت الخرب البجمـــع
ما شـــــرط تجيب تلاجة *** كفاية الزيـــــــــــر البنقع
***
ما دايرين كبدة وشـية *** بي ويكة تقيلة بنشـــــــبع
ما أصلو شــبابنا الودع *** ما ممكن تانــــــي بيرجــــع
أحلامنا الكانت بــدري *** ما عادت تانـــــي بتنفــــــع
دايرين الشاب الأغبش *** حتى لو فقــــــران ومقطع
لانو الفيهو الفايــــــــدة *** ليهــــــــــــو دوام نتطلــــع
حياة الســــــترة أملنا *** انشاء الله ربنــــــا يجمــــع
يحن الله عليــــــــــــنا *** ونشــــــيل أيدينا ونرفـــــع
***
للرب شـــــكوانا بنرفع *** والبايـــر كله بيســـــــــــمع
في دربك يامـــا جرينا *** والعين الســــــاهرة بتدمع
كم مرة ايدينا اتمـدت *** والرد الجــــــارح اقنــــــــــع
احلامكم والله غريبــة *** وللعـــــــين بتزغلل وتذلــــع
طلباتكم لينا تحيــــــر *** جايين تتواضعوا هســــــــــع
ما جينا زمان شن قلتو *** يافقير يامقطـــــــع أرجــــع
***
ما عندك حق الســــــــفة *** لابس دمـــــــور ومرقع
دايرين العنــــــــــدو مصانع *** لو كان لي غيروا بيركع
ما جينا زمان شــــــن قلتو *** يافقير يا مقطـــع أرجع
في جيوبك ساكنة عناكب *** لو كان باعوك ما بتنفع
دايرين العنـــــــدو الفـــــلة *** لو كان حنكوش ومدلع
ما جينا زمان شـــــن قلتو *** يا فقير يا مقطـــع أرجع
***
لو ماشـــي لآخر الدنيا *** تركــب رجليك تتبرطــــــع
دايرين العنــــــــدو البنز *** لو يبقى عجـــــــوزاً أصلع
ما جينا زمان شن قلتو *** يافقير يامقطع ارجـــــــــع
يا البيتـــك مبني زبالة *** ومن غير فيضــــان يتزعزع
دايرين العنــــــدو الفيلا *** لو كان صغيـــــر بيرضــــع
ما جينا زمان شن قلتو *** يا فقير يامقطـــــع أرجــع
***
وموكيتاً فخـــماً فاخــــــــر *** ونجفاً بالـــدر مرصــــع
والكندشة فريون ضــــاربة *** وثلاجة فريــــــزر تجمع
بي فيديو كاسـيت وأتاري *** نتسلى لو وكتنا نضيع
ما جينا زمان شـــن قلتو *** يافقير يامقطع أرجــــع
***
دايرين زنقيل ومقنــــــدل *** لو كان تمســـــاحا يبلع
والعملة الحرة ضــــــروري *** والمهر دولارا يدفــــــــع
وبشرط الشــيلة العامـرة *** والكرسي الجابر يلمـــع
وذهباً مختوم وأســـــــاور *** مليانة الإيد للأصـــــــبع
وضروري الحفــــــلة بوردي *** والكابلي اللحنو موقـع
ونقضي عسل في أوروبــا *** ونطوف العالم أجمــــع
بي لندن وروما وموســـكو *** وفينا المدن الأربــــــــع
نلبس في الكاسي العاري *** ولو طلعت موضة بنتبع
وناكـــل فاكهة طـــــــازجة *** وبالخير نتمتع ونشـبع
أفلامـــكم والله عجيبـــــــة *** خلونا نحمض ونطبـــع
ماجينا زمان شـــــــن قلتو *** يامبهدل أوعك تطمـع
***
مد رجليك قـــــدر لحافك *** وشوف ليك طـورية وأزرع
لي مين تتقــــــــدم انت *** يا قرد ياقبيح يا مبرقـــــع
كيفن بتحـــــب يا أغبش *** من غير شاكوش تتفرقع
لو كان بنحــــــــب الزيك *** ما أخير الموت الأســـــرع
لو مت وفاتك تفــــــــــرح *** ولو عشت حياتك تفجـع
ولو تبقي ضراعي الأيمن *** في لحظة بنقطع ونجدع
***
ما قلنا الدنيا دي فانية *** وآمالنا مظاهـــــر تخــــدع
اختاروا العندو ديانـــــة *** الديمة وشـــــــو بيلمـــــع
قلتولنا خلاص انتظـــرو *** الحــور في الجنة بتنفـــــع
الليلة قطـــــــركم صفر *** والعمـــــــــــــــر ولى ودع
عجزتو قعــــــدتو تقولوا *** واشبابنا الأغبـــــش أجدع
ماجينا زمان شن قلتو *** يافقير يا مقطــــع أرجــــــع
***
ما جينا زمـــان ليه كنتو *** جاهــلننا زي الشــــــــفع
ما خلاص الليلـة وقعتوا *** من قد القفة الأوســـــــع
والليلة قطركــــــــم دور *** وقعتوا في وش المدفــــع
رافعين الراية البيضـــــاء *** لكن هيهــات ما بتنفــــــع
رافعين لعرس جماعي *** وفي العشرة ألف ما بنطمع
وهنياً ليكم كبدة وشية *** بعـــد الأضراس تتخلــــــــع

طولي..
طولي يا طول العدو
زي التقول ماطنّي مط
ماشي في الشارع عديل
وعشان طويل
يقولوا بتّاوق بي الحيط
رجليني الطوال
الاتنين شمال
رجليني جايات غلط
الناس رجولا قدُر كِده
تلبس في الجِزم
وأنا رجولي قَدُر كده
ألبس في الشنط!
طولي يا سبب الأذيّة
الناس طولها ميّة سنتي
وإنتَ ألف وخُمسميّة
الناس تِحت تصلي العشا
وأنا لسه شايف المغربية
طولي يا سبب الوجع
الناس لو دايره تتكلم معاي
إلا في كم وكم حاجة تطلع
أدنقر في الباب أقوم ألقي الباب هنا انقلع
أخش جوّه الأوضة
ألقى العرش ارتفع
طولي يا طول الهنا
الساعة ديك أظن أمي كانت تفكّر في برج
وبعد شوية جيت أنا
ولادتي كانت متعثّرة
وأظنها في كم سنة
الظاهر كل يوم تطلع 10 متر
ولسّه ما كملتَ أنا
وفي النهاية، يومي الإتولدتَ
شالتني الدهب ختتني في المخدّة
نايم جوّة في الأوضة
ورجليني برّة في البرندة
طولي يا البقيت لي دليل
مما دخلت المدرسة لا قريت أولى لا تانية
دخلت ساته عديل
قعّدوني في آخر كنبه عشان طويل
والشُفّع يقولوا طويل عنقوق
راسك ما فيو طايوق
عشان طويل
لكن نحنا الطوال
حصّلنا القمر في النجوم نتشال
نحنا طوال زي قصر الشباب والأطفال
وزي قاعة الصداقة
والناس القصار ديل، سكن عشوائي
بتشيلن الكرّاكة

سموك ندى
قلتي ليّ سموك ندى!؟!
وده منو السمّاك ندى؟
ده أكيد أبوك
إنعل كِدة!
فيك شنو يسمّك ندى!؟
في صوتك أتخن مننا
إضنين كُبار زي دِشّنا
وتقولي ليّ سمّاك ندى!
خشمك ده ريحتو معفّنة
ايدين كبار حقات بُنى
وتقولي لي سمّاك ندى!؟
المشية كتّاحة وعلال
كرشك تقول شايل جَنى
وتقولي لي سمّاك ندى!؟
قالت لي "ها هدى في البطاقة إسمي ندى"
شوف يا أخ..
مافيش علاقة بينك وبين ندى
خلّيها ندى ..
خالت قريبة جارت صديقة ناس ندى
ما فيش علاقة
ندى في العيون أكحل مجعّد مسوّدة
انتي العيون فوقن قضى
ندى في الحواجب زي هلال
قصة نصوم دي مؤكدة!
انتي الحواجب دلجة بس
قلم الحواجب هاردها
وتقولي لي سمّاك ندى!؟
ندى تبتسم آلالاف مؤلفة تسعدها
وانتي الخشم شارّة التلاليش
بس طبق ومغطّي صينية الغدا
ندى في الوشيش نظرك بشيش..
ما يعقّدها
وانتي الوشيش وش الجحيش
نخرين كُبار كُرعين ردا
وتقولي سمّاك ندى!
قاتلي "آي أنا إسمي ندى"
شوفي أوعك تقولي اسمك ندى
ندى ما بس الاسم
ندى الجمال زايد الأدب زايد العلم زايد الفهم
ندى في الجمال ما شُفنا أجمل من كِده
ندى في الدلال خصّاها بيو رب العباد حين أوجدها
ندى في الأدب ..
ربّوها بيو رجال ياكلو النار مولّعة موقدة
ندى في الكلام
طبيعي صوتا بيجيب صدى
ندى في "البزاغ" ..
شربتي "سفن أب" ياهو ده !
وتقولي لي سمّاك ندى

في الليلة ديك

الليلة ديك
القصة ذاتا بقت عليك
يا عبدو وأدوك الشريط
يوم قلنا ليك انضم معاها وانتظر
شوف اليكون إن شاء الله خير
أبيت تسمع كلامنا بقيت لميض
قلتا احسن أكون تقيل
أنا ما جميل
باكر بعد باكر بكهربا ليك بي نظرة قتيل
وبقيت تقيل لامن سقوك موية الغسيل
وقعدت يا زينة الرجال
كهربجي قال
يوم جيت تلفلف زي زمان وتباري بقعر الشجر
كيس كراسي الخيزران
والبت تجي وتمشي وتلف مرات تقيف
يا زول معاها ولد حريف
صاحبنا بالحساس عرف
وسالت والناس كلموك
ملعون ابوك دنيا أم قدود
بقت.. البقت
وقعدت في شارع الزلط
تبكي وتجعر
والخدود اتورمت
ضهر القميص
كم القميص .. يد القميص
حتى الفنيلة اتشرطت
يا عبدو عيب
قوم يا خي صلي علي الحبيب
يا أخوانا لا أنا داير أموت أقع البحر
أنا بنتحر
يا عبدو عيب الدنيا حر والموية بتسخن عليك
تلاتة ساعات كاملة زولنا يسب ويكيل
ودموعو تتخرخر تسيل
دموعو سايلات بالكفوف
وشرايطو تلمع في الكتوف
بقى فيلسوف
في كلام عن الدنيا أم قدود
وعلاقة بين يوم السبت وعين الحسود
ومقارنات بين الجمال والجهل وسوء الاختيار
قال شينه قال
قال شينه قلنا كلام صحيييح
وخطيبا زاتو ولد قبيح
وكمان سنيح
دا كلام صحيح
بس ياخ قوم
صبحت دار ننوم
قام تاني جاب سيرة البحر

وطبعا كل ده منقول

» ♥موسوعة عبارات ترحيبية♥
» ♥موسوعة عبارات ترحيبية♥