اكبر موسوعة شعر حلمنتيشى فى المواقع السودانية

بوش السودان الحبيب) .

الاهبي ببوشك شبعينا -------وجودي بالطعام لجائعنا
نريد لدفس البطن بوشا------نكون باكله كالمجاهدينا
ولن نرشي سواه و لو بلحم—فلسنا في اللحوم بطامعينا
اذاما لاح طيف اللحم يوما---نبحلق فوقه لااكلينا
(ننونو)كالكدايس عند لحم-----وننبح كاكلاب مشاكلينا
فيا لحما يقد الجيب قدا------كفاية مغصتك السويتا فينا
فان بطوننا يا لحم ابت------علي الافوال بعدك ان تلينا
تمطقت الخشوم لاكل بوش—تدنكل بالشطوط و الطحينا
وزغردة البطون لاكل فول---تصوت تارة و تحوط حينا
اذا ما البوش جهز فوق صحن—تخر له الاصابع ساجدينا
وتركع في نواحية الايادي -----يصوم عن الكلام (البوز) فينا
سلي عنا المطاعم في البراري ---سلي الفوال يخبرك اليقينا
بانا نورد المعدات جوعي -------و نصدرهن تخما قد كفينا
ونشرب اذا شربنا الشلي طاعما---ويشرب غيرنا كدرا و طينا
وان سوف تذكرنا السفاسف -------مدنكلة لنا و مسفسفينا
وان غدا وان اليوم اكل------------وبعد غدا نكون الاكلينا
فما شر السفاسف ام ليلي ---------اذا كانت مدنكلة تجينا
يزين صحنها بصل و توم -------وماء الجبن لاح لناظرينا
مدنكلة كان الزيت فيها----------اذا ما الماء خالطها سخينا
فاني قد خبرت الاكل دهرا------وخضت غمارة طورا و حينا
بفتيان يرون الاكل مجدا -------و شيب في الطعام مجربينا
نسفسف ما ترضي الناس عنا ---ونهجم كالاسود اذا دعينا
فبوش قد اكلت بسوق بري -----وفول قد اكلت بطور سينا
هبشت الجيب بعدها –بكيت----يرن امام صاحبة رنينا
فما حظ المفلس غير شوم ----يعيش العمر مكتئبا حزينا
اذا ما كان بالامكان يوما-----اعبي الجيب اجعله متينا
لكنت ملات هذا البطن لحما---وهامبيرقر و تفاحا و تينا
لصرت مفتل العضلات ماكن----و منتفخ الجضوم فتي سميتا
و كنت و ليس بالامكان هذا -----وكنت حسبت هذا الفول طينا
اراني قد فطمت بماء فول ----- ولسنا لبيرقر بمناسبينا
فهل عربية الجازولين تمشي ؟ اذا كبولا يوما موية

ياااكل البوش كل لحظة لك تهانينا
ولتيتو تجدنا مهنئينا
فما اجمل طعم بوشك وبوش أمريكا اللعينا
جن جنونه يوما لاننا ببوشنا في السودان شبعانينا
وبوشهم زله العراق ومن الافغان اخوانا مجاهدينا
يا لحظك ياتيتو ببوشك ففي غزة الاطفال موتي جائعينا
وفي الخليج كبسات وللبعير شاوينا وفي حكام لاطفال غزة محاصرينا
أبعد هذا بالبوش هناء سننام بالاحزان من أجل غزة متوكلينا
نفاج بالفرح نغزيه وقلم الابتاوي عن غزة من المدافعينا
فكيف نشبع ببوشنا
وبوشهم بكبر كروشنا من الفرحينا
سنشبعيوم نري في بوشهم يوم بدر
ونهناببوشنا اجمعينا

ود بانقا أسمع بقى
أصلوالحريم ديل دربهن درب الشقى
و إنت مش أول بطل تطلع قضيتو مطرشقة
والقمرة كان تشابى كان تطلع جبلما بتلحقها...
بت الأمين يا نجمةالليل الحزين
الفي سماها معلقة
ما ليك حق تتسدي في ود بانقا
ولدا ظريف حافظ العلم
حل المسائل و فرتقها

في الليلة ديك
القصة ذاتها بقت عليك يا عبدو وأدوك الشريط
يوم قولنا ليك أنضم معاها وكلّمها
لكن أبيت تسمع كلامنا
بقيت لميض وقلتَ.. أحسن أكون تقيلأ
نا يا جميل باكر بعد باكر
بكهربها ليك بي نظرة
كتيل وبقيت تقيللا
من سقوك موية الغسيل
يوم جيت تنطط زي زمان
وتباري بقعور الشجر
كايس كراسي الخيزران ..
وقعدتَ يا زينة الرجال
كهربجي قال رفعوا الستار
والبت تجي وتمشي و تلف
ومرات تقيف ومعاها كان زولاً حريف
والوقفة كان وقفة ولف
وصاحبنا بالاحساس عرف
وسألتَ والناس كلّموك
ملعون أبوك دنيا أم قدد
بقت البقت ووقعتَ في شارع الزلط
تبكي وتجعّر والعيون اتورّمت
يد القميص.. ضهر القميص.. كم القميص
حتى الفنيلة اتشرّطت
يا عبدو عيب قوم يلا صلي على الحبيب
الواطه صبحت داير ننوم
يا أخوانّا لأ أنا عايزأموت
أقع البحر يا عبدو عيبا لدنيا حر ..
والموية بتسخّن عليك
ثلاثة ساعات في الطريق
وزولنا قاعد يسب ويكيل
ودموعو سايلات بالكفوف
وشرايطو تلمع في الكتوف
بقى فيلسوف
شي كلام عن الدنيا أم قدود
وعلاقة بين يوما لسبت وعين الحسود
ومقارنات بين الجمال والجهل وسوء الإختيار
قال شينة قال ...! قال شينة
قلنا كلام صحيح و خطيبها زاتو ولد قبيح
بس ياخي قوم الواطة ليل..
دايرين ننوم
قام تاني جاب سيرة البحر
وقام تااااااااااااااااااني جاب سيرة البحر

سلبطة !! شعر حلمنتيشى!!!!
بحبك
منو القال ليك بحبك
حصل شفتيني اتكبكبت ولا جريت انا في دربك
ما ساكت قدر مكتوب كان جابني وقعد جنبك
ولمن كان بعاين ليك
ماعاجبني لون عينيك
ساكت كنت بتسلي
وبفكر في خلقة الله
وقادر انت يا الله
كيف خلقك وكيف رسمك وكيف سواك قوريلا
ورقبتك ناطة منسلة
وراسك ذي غطاء الحلة وكلك توب وباروكة
ياملوخية مفروكة
وبرضك تاني ليكي امل
برضو تقولي شاغلتك اشاغلك ليه رماني جمل

تغُشيني وتقولي لي بحبك زين
وانا المسكين وانا المغوش وتاريك لاعبه علي الحبلين
يا غشاشه يا دجاله احبك سيف جديد وسنين
يقطع ليك ادياتك يكسر ليك كريعاتك
يخليك طير بلا جنحين
تطيري سنين وما تلمي بدل واحد تحبي اتنين
واظن عشره
نحن عندك ذي فستان كم طويل وكم قصير
واحد للبس بالليل واحد في الصباح تاتيل
احبك صرمه يا ضرمه واحشك بصله قاؤرمه
واسويك فته لطاشين
برضو تقول لي بحبك زين
وكل قطر رسالاتك تجيني مطر
حبيبي اللونك الاسمر
بلاك الدنيا ما بقدر
قطر يشيلك يوديك السما الاحمر
يشيلك زي هبوب طوكر
وانا الكان مناى نكون اتنين
نسكُن في قصر عابدين
وازور بيك لندن ديك يا السمحه واوديك فسحه لبرلين
لكن فورتي علي دمي
وكترتي علي همي
وانا البوراك نسيت امي
ونساك ربك
برضو تقولي بحبك زبن
احبك سيف جديد وسنين يقطع ليك ادياتك
يكسر ليك كريعاتك يمعط ليك شعيراتك
يخرب ليك لقائاتك يخليك شينه بين قوسين
طالب ربي يوم يبلاك بواحد يكون عنتر
عضلاتو حديد ادياتو متر
يطرشك كف يلفك لف يلخبط ليك وشك المبدول يخليك لا قرد لا زول

ومـــــن حـــبـــك I shall die
مــن شِــدّة مـــا إنـــتِ beatiful
شـعــري الــفــي راســــي fly
I see فــــــي عــيــونــك sea
I can't swim بــــــــــــراي
when I see you فـــــــي الـroad
going to the shop بــــي جــــاي
cutting the زلــــــــــــــط
on foot with shoes small and high
I don't know what I can do
I can't believe my eye

سمـاحـتـك عـقّـدتـنـي عــديــل
أعـايـن لـيــك دمـوعــي تـسـيـل
أكُـر فــي الحـمـدو عشـريـن مــرّة
وأقــرى معـاهـا ســـورة الـفـيـل
ولمن تمسكي المنديل وتمسحي بيو كحل عينيك
لـمّـي الـدمـعـة فـوقــوا تـسـيـل
أعـايــن فـــي عـيـونـك ديـــل
وأقــول أريتـنـي كـــان مـنـديـل
مــا بنـفـع كـــلام يـــا ريـــت
نـوعـي ده مـــا شَـبَــه مـنـديـل
مـلامـحـي قـريـبـة للـصـارقـيـل!
كـيـفـن بـــس أكـــون مـنـديـل
ولــمّــا تـقـومــي مـنـعـدلــة
وتـقـدلـي لـيــك كـــم قــدلــة
أفـنـجــط بــــي وراك ســــاي
الــتـــقـــول ســخـــلـــة
أعــايــن وأقـــــول هَـمَــلــة
وحـــلاة الـقـدلـة فـــي أهـلـهـا
حلـيـوه وتـمـشـي بـــي جَهـلـهـا
وتـتـقـصّـد مــشــي الأصــلــة
وأنــا الفجـغـونـي بـــي عَـدلــة
أنــا الـيـادوب فــي دنـيـا الـريـد
منـاي يــا رب ســلام فــي الإيــد
عـيـونـك زي عـيــون الـصـيــد
كُـبــار زي خــــروف الـعـيــد
تـكـهـربـي بـيـهــا خــلــق الله
ونـوعـي ده عــاد جنـونـو يـزيــد
وأقـول يـا رب تسلّـم لــي أو سـاكـت
تأشّر لـي، وكـان غمـزت ده يـوم العيـد
وعينـيـك طالـعـا بينـهـا طـــوّاف
لا الـكـبـكـابــة لا الـــرجّـــاف
تـقـول رشّـونـي بـــي البـفـبـاف
يــجــيــنــي رعــــــــاف
وأقـعـد ألـــف، عـيـونـي تـــرِف
وأقـول أكيـد ده أثــر فـطـور الـفـول
لـمــنّ تضـحـكـي فـــي نُـكـتـه
التـقـول لبـعـونـي بـــي شـنـطـة
وأكــب فــوق العـصـيـر شـطّــة
وأقـرطـع مـــا أسـيــب نُـقـطـة
وأقـول "يـا ســلام عصـيـر لُقـطـة"
وإنتِ تقولي"بالغت وشربت الشطّة يـا إنـتَ"
مالها الشطّـة، مـا شربـات عصيـر كُفتـه
عصـيـر جـركـان مـــن الـدُكّــان
يـتـرشّـه فـــي صـحــن فـتّــة
مـــا مـهــم شـرابــي الـشـطـة
والـمـهــم الـكـلـمـة "بـالـغــت "
و "شـربـت الـشـطّـة يـــا إنـــتَ

باص البنات
الليلة شوف باص البنات
عجلاتو كيف متحننات
الكي قبل والكيس حرن
يمشن تقول متوحلات
لمباتو خلقه مكحلاتمن غير دلال
كنباتو من داخل عدااااااااال
شايلات بلومات الكلالي
الحبهم في عروقنا سال
بتزينو من أزكى العطور
عادمو الكبير بطلق بخور
سواقو ديمة صباحو نور
ومساهو نور
ورفارفو من قدام خفاف
مضروبة بي أحمر شفاه
وأنا بس بخاف
وخوفي الشديد لايدك خفاف
دايرين وصولك بالسلامة
وتجينا يا برج الحمام
ونتلمه في الكافتيريا كووووم
ويتلاقو أحباباً قدام
ونعمل تمام
الكل حضور مافيش غياب
كل التياب اتجمعوا
تسمع ضحك تسمع سلام
وتحت التحت تسمع كلام
آآآآه يا حريم نوعكم عجيب
مرات كلامكم لينا طيب
لي روحنا انتو بترفعوا
مرات علينا تزرزروا وتتأندلوا وتتدلعوا
ولمن تحين ساعة الدفع
نحلف يمين ما تدفعوا
ونفضل نجيب الشاي وباللبن الحليب
وكمان نجيب وكمان نجيب
ليمون ملخبط في القريت وتبلعوا
وتقدو جيبنا ونرقعو
وتقولوا ديرين ترجعوا
من نوعنا خالص تقنعوا
تاخدونا طرحة بدون ايجار
تاخدونا وينفك الحصار
وتروحو غير ما تودعو
راكبين علي باص البنات
خطراتو باقة حلا وحمار
يا ناس خلاص أنا قلبي فار
نطرح بلاش من دون ايجار
و جوفنا من باص البنات
جوه الخشم فتحت غبار
نطرح بلاش لستكنا طار
نتعب نلقطا في الظلام
تلقوها ميتات بالنهار يا ناس نزار
تلقوها ميتات بالنهار يا ناس نزار

يا واقفة بين صبري وتروس الفرملة
أنا بحكي ريدك للملأ
والجاني من بستم مشاعرك
بلفو طار بحكيبو لليل والخلا
و أنا بعذرك
وأوزن دركسون الصبر
وأضغط كلتش الأمنيات
لو ألحقك
يا الحنتا زي زيت رجوع
أسود من الشقا والدموع
@@@@@@@@@@@@@@@

قال جزار:
يا طاعمة زي كبدة ابل
بالشطة والليمون شفا
أنا بي وراك سبت القطيع
ضل الدريب وعليك حفا
يا كاسرة بي فرار هواك
أضلعي وظروفي المؤسفة
@@@@@@@@@@@@@@@@
قال مكوجي:
يا كاوية قلبي قبل قميصي
رشيت لياقتو وما انكوى
يا ريتني لو أغسل دواخلي من الهوى
زي عمة بيضا أشرها
صابون هواك غسل النوى
@@@@@@@@@@@@@@@@@@

قال نجار:
مسمار ودقيتي
في خشب الليالي المحزنة
منشار هواك
قطع الصلات الممكنة
يا أبلكاش وفورمايكة
أو تك خشب الجنوب
@@@@@@@@@@@@@@@@@@@@@

قال واحد جعان:
يا حاجة أشبه بالرغيف
مرقوها أسي من الفرن
أنا بفقدك لما العيون
تشتاق أماسيك الشبع
واتخيلك قدرة
ورحيق الفول
انشالله في أحلاك ظروف
ما نشتهي الجبنة ونطوف
كل الدكاكين مغلقة
والزيت صبح يا زيت مناي
مافي ونشف
مصران مشاعري المرهفة

قادر ألمو
أصلو مجروح جاري دمو
ضربو زايد..قاسي همو
قالوا سبب الرجفة والموت
الحليو الأسمو مـــــمــو
وأصلو مـــــمــو....
كمو كطو
وكطو كمو
أبوها بابي
ومامي أمو
من الجماعة الكل يوم
قاعد استحموا
والعطر خمسيـــــــــن متــــر
حـــرّم تشمو
ولما تقدل بس تقول
تقلع ترابا البتمشي فيهو
عديل تخمو
طبعو رقه
لونو منقه
في أوروبا مارادونا
وفي بلدنا مافي زيو
الا تنقا
و أصلي مما شفت مـــــمــو
قلت يا ناس دي الملائكة؟
ولا خلقه
قالوا خلقه
قلت انو.. ما أظنو
وأصلي مما شفت مــــــــمــو
عقلي فرّ وقلبي دقه
وبنطلون الجنز طقه
أي عجور ضقتو بعدو
لقيتو منقه
باكو السجاير جوه جيبي
لقيتو حــقـــه
الفنيله اللونا أبيض
فجأة جيت!!
ولقيتا زرقاء
ياريتني لو من مويتو
ألقى ليــا بقه
ان شالله حتى
لو فيها شرقه
ياريتني لو في بحرو
ألقى ليــــا غرقه
كنت بغطس
و ما بدور لي تاني مرقه
تاني أمرق؟
وين أقبّـــل؟
للبعاعيــــــت؟
عليكم اللــه ديا خلقه
مـــــــمــو يا ناس ما أزانا
بي خدودو البرتكانه
مــــــــمــو يا عالم جمانه
لا أكل يوم زي عشانا
كسره بي لبن البطانه
ولا شرب من زير مغبّـــر
زي فلانه وفرتكانه
مـــــــــمــو مافيـــــــــش منو اتنين
هم مخلوقين براهم
ونحن مخلوقين برانا
الفرق........!!!!!!!!
نحن بنعوس كسرة في الصاج
وهم رغيفم بيشتروه
من أجزخانه
الفرق..........!!!!!!!
هم بيمشوا عديييل أفوتو
ونحن نترجى البكاسي
ويومي نتلفت ورانا
الفرق..........!!!!!!!!!
هم عندهم توليت مكندش
ونحن عندنا أ..........خانه
مــــــــمــو حنّـــي عليكي بابا
تعالي نعمل حبكانه
يمكن أتعلم
أحب ناس هاي وأروق
بدله فاخره واستكانه
غايتو حأقول ليكي حالي
كان نفع قولي أوكي
مانفعت
قولي ما نافع معانا
عندي شده
وبنطلون واحد مرقع
حالو حالنا ومستوانا
أبوي مزارع
يحفر الطين بالطواري
عرقو نازل
في هجير الدنيا
في الصيف والسخانه
شان ألقط لقمه...لقمه
شان يتمتم لي...عشانا
شان يشوفنا
نقرا نتعلم برانا
عمي ترزي...وكان تمرجي
ولادو دسته
وكلهم ساكنين معانا
مـــــــمــو يا الجو المكندش
شوفي كتاحة هوانا
وأصلي عارف
بكره يظهر مغترب
ناكل النيم والزلط
وانتو بتلوكو اللبانه
ونحن بنكابد نجابد
ونبقى في الآخر ضحية
الشواكيش كع....كرع
التقول بس بندقيه
والمآسي الفي جوانا
كل يوم بتزيد شويه
الا بس أصبح عزانا
طيبة القلب البينزف
وكتين الناس بتشحد
زكل أطفال التشرد
لما يمشوا عشان يرقدوا
ينوموا في نص الشوارع
يعني ما يلقوا المكانه
الا بس أصبح عزانا
طيبة اخلاصنا ووفانا
وكتين أولاد المدارس
موت يدافرو..في طريقهم
شان يكتبوا الحصة
في حينا وزمانا
الا بس أصبح عزانا
حب بلدنا
حب وطنا
منبع الخير و الوداعة
ريحة الطين و الزراعة
حب تقاليدنا وطباعا
و فوقا ما بنرضى المهانه

سيد بشبش سيد بشبش
عامل حازم وسيفه بيرقش
أمره بيمشي وكفه بيطرش
وعينه الحارة في يوم ما بترمش
عند المكتب رسمي بيغضب
جوة البيت يرفس ويضرب
وسط أصحابه بيرقص ويلعب
راجل نكتة وصاحب مقلب
وآخر الليل يقابض ويهبش
سيد بشبش راجل دين وراجل دولة
وراجل خطوة وصاحب مطوة
وصاحب خولة وصاحب جولة
وبيني وبينكم سيد بشبش
راجل واعي وفاهم
فاهم فاهم
وعامل انه الواحد يعني
وغايتو وبرضه ولازم
بالمفتوح ده كلام سر
ما فيش واحد يمشي يسمع
سيد بشبش راجل دوغري
لكن في الليل هجيجه يولع
وزي ما تقول بحب المنقة
و الحاجات النايس ولظلظ
وقبل ما ندخل ونحكي القصة
لازم نعرف صورة بشبش
أصلع أسمر بادية عليه علامة النعمة
وعرجة خفيفة في حادث حركة
شكل سيادته عموما مدهش
وددايما شايل سبحة
تسبح وحدها دون تسبيح
أوتوماتيك
حكمة ربك وقسمة صحيح
سيد بشبش راجل
Urgent
Rich, intelligant
Smooth and elegant
But sometimes
And this is really
He appears slightly hesitant
وفي عصرية وكانت جمعة
سيد بشبش حكك دقنه وهذب شنبه
وشه بينضح نظرة ولمعة
طق عصايته وخت عبايته
وخبط الباب من خلفة برزعة
خلى البيت يتراجف كله
حاجة نفيسة بناتها ثلاثة
بالاولاد يكملوا سبعة
في المرسيدس أخذ القعدة
كدوسه البني تهبهب ناره
هز دماغه هز
يعني سيادته بحي في جاره
وعاد البنز قال يا ليل
وسط الشارع يلوي غباره
وأثناء ما سايق وسط السكة
كان بيدندن يعني بيمدح
دشكا دشكا دشكا أو دشكا دشكا دشكا
وأثناء ما سايق يغني ويمدح
وعينه الزايغة بتجمع وتطرح
هناك على زاوية لمح المنقة
سيد بشبش تمساح لو يلمح
قلبه ينطط جوه ضلوعه
يطق الروب يثكلب ويردح
لف ودور حول المنقة ودور ولف
رسم الزاوية وكشف المسرح
وبسمة أنيقة صناعة برة
بسمة ثعلب حنكة وخبرة
ما نتفاهم يا خلق الله
وعاد خلق الله ما فهامة وناس واعين
اشارة خفيفة وغمزة عين
عارفين الحال والأمر الواقع
كان الرد الفرح بشبش
وخلى سيادته يهدي يمين
مساء الخير آنسة مرمر
اسمك روعة اسمك سكر
أما سيادته سيد بشبش
رائع مدهش اسمك منعش
موسيقي ومطرب
بس خازوق الناس تتمقلب
وتمشي تقول لسيادتك شبشب
لا يا بت يا نكتة صنفك متعب
وهناك في شارع كم مش عارف
البيت الناصية أشجار وزخارف
عربات تتلاعب أنوار ورفارف
كانت ربة وهيصة تولول
ناس بتصفق وناس بتزغرد
وناس بتهلل
ناس بتنادي شيلي وختي
وناس بتغازل أموت يا أنتي
وناس مبسوطة غاسلة وكاوية
وناس ركاني بتعزف زاوية
وناب بتغني حني يا تتي
وسيد بشبش أمير الموقف وبطل الساعة
كان مشغول مع ناس مرمر
يصلوا جماعة
ولمن تم صلاته وسلم
قام يسلم بالأحضان
قال مشتاق وكاتلو الشوق في الحبان
وزي ما قلنا قبيل عن بشبش
راجل بهجة جد فنان
جدع العمة هناك وعصايته
ولحق جزمته والقفطان
وهاك يا دانص
ودارت حلقة عجاج وغبار
ناس بتسوي ردحي جد
وناس في الردحي رقيصها هزار
وناس انبطحت وناس اندرشت
ناس انكرشت عشان تنمد
وفجأة في لحظة حصلت كبسة
زي ما تقول البيت انهد
الجو اتلغم
فال اتسمم
وصل الكومر شكله يخوف
نزل امباشى معاه الأورطة
عملت سد وجاط الموقف
سيد بشبش ضرب اللخمة
ربط الساعة مكان الجزمة
لبس الجزمة فاكرها عمة
لف العمة محل الساعة
جذب قفطانه رمى الشماعة
فكر ينط من فوق للحيطة
تلب توف جوه البلاعة
جوه الكومر بالبوليس الناس شحنوها
البتباكى والبتوجع والبتعذر والبتشفع
الضحكات باهتة
وفي نص الكومر كان متمحن سيد شبشب
ماسك سبحته
مرة يقحقح ومرة يسب
مشغول بأولاده وحاجة نفيسة
وناس المكتب
كيف القصة هناك بحكوها
وكل ما مرمر تبسم ليه
يسب للمنقة ويوم زرعوها
سيد بشبش

ام شداق

ريدي ليكي يا ام شداق
اقلب اللوري في الدقداق
وكت اغلط واقول مشتاق
عيونك جووو تبحلق جو في عيوني
وتجعوط في مصاريني
اتوكل واقول بريدك يا سجم خشمي
!!!بريدك قايله من قلبي
وحاتك خوف
خايفك يوم تهجميني وترجميني
وفد ام كف تكتليني
هي يا ام ريدن بعج بطني
هي ام حبن شرط عيني
!!!اريدك انا
!!! اريد لي فيل
احلني الله يالبرميل
شقوق كرعيك تدخل ضب
تدخل فار
تقول سحليه راسا عديل
!!!اريدك انا
وحاتك الا بي الشلوت
هي يا الهارياني يا الكتلاني
يالباقيه لي شوكة حوت
كل ما اجي
تطفشي مني البنوت
شكيتك علي الله يا ام زعمووط

ود اللمين .. حنكو السنين
كسَّر بنات الحلَّة جت
ود اللمين ما زول وجاهة
ولا سماحة
ولا جمال
ولا عندو مال
بس زول كلام
حبَّ الفطين بت الحسن
شفتوا الفطين بت الحسن؟؟
قطعة جمال
زهرة خريف
(أموت ركن)
فيك يا الفطين
بت الحسن
( وأصبح قطن)

وداللمين
أشكيك لمين؟؟
نشفت ريقي مع البنات
طيرتهن
جننتني

وأنا يا شباب
بكل صراحة وكل أدب
لا زول وجاهة ولا جمال
ولا عندي مال
ولا زول لسان
زول الله في بلد الله
بس
عشقي البنات
مكتول أنا..
فيك يا الفطين بت الحسن!!
ود اللمين
كان شفتو يا اخوي الخزين
جنن بنات الحلة جت
خلانا نحن العاشقين
نضحك برانا بلا سبب
وقتين يقول
( اجلي المقاطع بالدهب )
مرات نهيم وسط الغيوم
و نتوه كمان وسط السنين
مرات يقول ( اربعة سنين )
مرات يزيدها كمان سنة
سنة يا أنا
يا أنت يا ود اللمين
خليت بنات الحلة جت
ختو الجرايد في الأرض
جاريات وراك طول النهار
شان يسمعو النغم الحنين
و خليتنا نحن المتعبين
جارين وراك
طول السنين
لو نلقى ( همسة شوق ) معاك
أو حتى نظرة من الشباك
لي الأسمر الراسي الرزين
قول لي كيف بعد السنين
و الغربة و الشوق و الحنين
تهجد عيوني من السهر
و اهتف معاك ( رجع البلد )
للغالية أم طبعاً رزين
القالو سموها الفطيــن
أنا ياالفطين بت الحسن
( مكتول هواك أنا من زمان )
قبل الزمان يصبح زمان
و قبل المكان يصبح مكان
من قبل ما عيال أب جويلي
اتغربوا في كردفان
و قبل الشباب ما يعرفوا
لــــــــــــــــيه ؟؟
ود اللمين
جهجه بنات الحلة جت

ناس دلعلع

ياخ قليبك
لما قاليك أمشي ريدا
ولما قاليك ياخ دي زولتك
وإنت سيدا
أجري حصل قبل ما واحد يصيدا
كمان جكيت وجيت جاري
وديل شاتوك وكانت شوتة ضفاري
ومين داري؟؟؟

وما يقبل
كمان يزعل
ومد بوزو
وخلاه زي وش شاحنة فوزو
خلاه أطول من كدوسو
زي رفارف حل قوسو
لما تنش
وحتى طرومو اللي دلاه
وخلاه نازل زي مظلة
وقاااااادر الله

وقال بريدك يا دلعلع
وناس دلعلع
خصر يطرح.. صدر يجمع
عيون تشرح.. جسم يلمع
تشوف العين
تشوف البغلة في الإبريق
وتبقى عليك يا إبليس الدنئ وبديك
وبضبح ليك جدادة وديك
نظر عينيو
دا قرش البصلة فوق الريق
كسر أنناس شهر ما بفيق
ولابسة التوب
وفيها جمالو أصلي أصول
وخصر جميل تقول مربوط
وجسم حرير بتلألأ
ويمشي خيوط
عيون تنعس رموشا تجوط
وماخدة اللون من الشربوت
وقوة كمان
تقول الملكة حتشبسوت

وناس دلعلع ناس قروش
فوق بيتو طابقين العروش
فوق سورو ساوين النقوش
مالك علي هوي يا القليب
عارفني من ناس البروش
ناس الكفاح ناسا غبش
نص النهار ضارب الشموس
الراس يدوش
هوي يا القليب ما تنقرع
خارب الطبع
والحالة ما نشفت زمااااااان
كرابا داير ينقطع
وهوي يا القليب ما قلنا عيب
لو كونو منقتنا الدليب
أولى.. ورقادنا العنقريب
رفعوا الملاح في المشعليب
وحتى العجينة الخمرت
بيكوسوا ليها فوق قرقريب
وكونو الوليد الفوق نخيرتو قطع كديب
عايش نصييييييح
طول عمرو ما شاف الطبيب

وهوي يا القليب تنطر يوم الكت مسافر
وجاي ضارب في البنادر؟
اليومة ديك ساعة الدغش
حاج عبدو كان داخل المراح
شايل ليه قش
ساعة الوليد لفخو الدحش
تنطر فاطمة وكيف كلاما؟
لما سالت دمعة من عينيها فوق سومة زماما
وأبت ترجع
راجية اللوري حد ما يمش
رغم الحجل فوق الرجل
سخن عليها من الشمش
طاري الدلعلع وريدا داك متجاهلو
بت البلد حارساك بي طولة الزمن
تفتح خشيما وتقفلو

يامن حببته وما حصل حباني
قدمت طلبي إليكم من مدة
صهينتموا مثل وزارة الإسكان
حبحبتكم حبا يؤدي بأضلعي
سجلته بالفحم في الحيطان
أنسيت قعداتي مقاصد بيتكم
متفرجخا في عتبة الدكان
راجيكي تفتحي بابكم في مرة
حتي أشوفك حايمة بالفستان
أو تكشحي موية الغسيل بجردل
ويا جردلا شالته أحلي يدان
أو تندهي لأخوك من شارع الظلط
وأخوك كبسة معاكي في كل مكان
أنسيت جلساتك في حفلات العرس
تتجملين بأجمل التيبان ..
وأنا مصنقر ناصية في مقعد
ومقهي فيك مسهي فيك مشحط العينان
وينقرش الطبال في طرقاته
ويلولو الفنان بالألحان
ويقوم ملعون يلوك بوسطه
يدعوك للكاروشه في الميدان
وتقومي ترقصي في الجمايكا بخفة
وتوزعي البسمات بالمجان
والكل ماج وهججوا مثل الجزيرة
تموج بالفيـــــران ..
يا ليتني سما زعافا قاتلا
لقرضتهم قرضا بلا إحسان
حتي العريس وعروسه سممتهم
وغرغرت باقي السم للفنان
جبت الكراسي كلها وردمتها
وأطلقت فيها حارق النيــران
كوركت يا ناس المطافئ الحقوا
النار إمتدت إلي الصيـــــــوان
واذا أتوا ناس المطافئ قلت :
يا ناس المطافئ ثوانــــــــي .!
في القلب بارود وفي المصران ألغام
فلتطفوا نار الحب في مصراني
أو تأمروا هذي البنية تحبني
ما دام أبت ريدتنا بالإحســـــــــــان

قصيدة تقارن البنت المتربيه في الغربه - مع بنت البلد.

هى زى هبهانة وما هبهانة

وزى بنانة وما بنانة

غايتو نحن مجننانا

حتة حتة مكسرانا

لسة ما عرفتوها برضو

دى ما ألانا

ألانا خلتنا عاد ننضم برانا

غايتو لو سكنت حدانا

نحن ما الله معانا

ألانا ما بتاكل فتة اصلو

وما بتمشى الاجزجانة

فيها حاجات مغلغلانا

تلاتة شامات جنب خدودا وجنب اضانا

اضانا زاتا مطنشانا

تلاتة حاجات لاها وحدى ولا توأيز

وفيها أيز اى واحد شافا مرة

الجماعة رقدوا خردة

أولزا بيبل راقدين جنايز

اف انا مرة اغتربت

ولى امورى اورقانايز

لى ابوها جوة هاوسو بمشى ليهو وما بلاوز

اصلى حربى وفقرى ييشن

اقولوا امايستميشن انى يور دوتا

رهيبة وليها عايز اعرسيشن

اف هو قال لى رافضيشن

ولى عيونو حمريشن

بقولو ليشن وبالحجارة بجدعيشن

وابقى بيشن

ألانا جاتنا فى الخرطوم هنا

الجماعة جنس دفر وجنس عفص

وجنس كبع وحريمنا عاد فتحولو تب

من الزعل داير ينفقع

ألانا جاية من استراليا

جكسينا عاد امبدة والديم والربع

ألانا جاية من استراليا

لابسة جنز بلوزة غالية

جكسينا ناس جكس العباية

وفى العباية قماش ملاية

ألانا جاتنا بقوها زى ست الودع

جاها واحد قال ليها يا ألانا

جرى كبسولة الزمن دى شهرين لى قدام

شوفينى بعد الامتحانات بباصى ولا بتشلع

جاتا وحدى قالت ليها الرسول يا ألانا

تجرى كبسولة الزمن دى عشرين سنة

شوفينى بتزوج ولا شاكوش بتلبع

بعدين ألانا لا بتنخلط ولا بتقتنع

الا لى انا دة فقرى جدا مطلع

انا عاد بخاف

قلت ليها ارح نقعد فى سنة تلاتة الاف

وفو مشينا سنة تلاتة الاف

قلت ليها تعرفى ناس القرن العشرين

ناس متخلفين ••• سفر بالطيارة

وكمبيوترات وجنس عوارة

اها قمنا راجعين كبسولة الزمن ضهبت

وقعت بينا فى امبدة جنب المزارع

نزلت منها ألانا شافت الناس بتاكل فى الكوارع

جرت للكمبيوتر قالت ليهو يااى

نحن فى ياتو زمن ؟

قال ليها نحن فى الزمن الضائع

ألانا معاها وحدى قالوا جانا

يعنى بس بالشايقى جينى

يالحلوى وظريفى

الكريشة ماها ظاهرى والرويس تب ماهو نيفى

جينى قمى وكونوا زاتا نشوفا نحنا

دى زاتا نعمى

والشايقى فيها اندهش داير

يقول دة الشغل قال دى الخدمى

يا وجع ساكن كلانا

الا جد جد وبامانة فى بناتنا بنلقى

مليون زى ألانا

فى السماحة عسل بدفق

ومسخن سكر كنانة

وفى العلم افكار دؤوبة

شان يطوروا مستوانا

فى بناتنا بنلقى حاجة ما بنلقاها فى ألانا

فيهن العفة الرزانة

وفيهن الامل البيضوى

فى مدنا وفى قرانا

[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذا الرابط]

تسألوني كيف عامل
حالتي و الله صعبة
من بقيت واحد موظف
قلبي للعربات حبَ
كل ما شاهدت تكسي
صفق القلب و شبَ
و اظل الليل احلم
راكبا في التكسي جنبة
و اقضي الصبح اشحد
يا عباد الله سحبة
إنني حالف بجدٍ
لو مشيت يوما اوربة
لست اكل لست اشرب
لن اشتري للعلم كتبا
و انوم في السهله برة
أنبطح في اي كنبة
شان اوفر كل مالي
و ابقى صاحب عملة صعبة
و اشتري فرفور (بيجو) مدنكل
خلفه اربط لي طرمبة
و اسوي البيجو تكسي
و ارب العاصمة ربة
و أخت في التكسي يافطة
تلقى جنب اليافطة لمبة
و كل ماشي يشوفها يقرأ
و اللي راجي التكسي جنبة
هذا تكسي خيري صاحب
وقف خالص للاحبة
للعمرهم ما بيقولوا تاكسي
و خشمهم مربوط بضبة
الملاحم ديمه ويكة
البحلوا بشاي و كمبة
مستعد طرح القماير
و للكلاكلة الفيها قبة
وحتى لي زقلونه بمشي
مين عندو في زقلونه رغبة
ماني واعد اي واحد
ما بنوم في الشاطي حبة
التنك مليان لضانو
و اللساتك الخمسة بمبة
Every things is well
و Right
لا كاسرة ياي
لا طافيه لمبة

لو زهجانه واظنك
ما عرفتي سؤالي عنك
يا اللزيزه الكلكي جنك
عايز اكون انا ابقي منك
اي حاجه قريبه منك
تبقي طربيزه ابقي كرسي
تبقي راكب ابقي تكسي
بيكي اسافر لام دقرسي
وتبقي حافله ابقي بوكسي
وياسلام لو ابقي ببسي
تشربيني
تقرطعيني
تدفقيني
وما مهم
هي قرطعيني
بس مهم شوفت عيونك ابقي اي حاجة قريبه منك
تبقي وردي ابقي ترباس
تبقي سانتو ابقي كدباس
تبقي بنكي ابقي حراس
تبقي برعي ابقي عباس
تبقي اوبرا ابقي ترباس
ابقي غرقان تبقي رفاس
رفسيني
وفتشيني
وغرقيني
وفنجطيني
وماهم
هي رفسيني
بس مهم شوفت عيونك وابقي اي حاجه قريبه منك
تبقي فالق ابقي مفلوق
تبقي كسره ابقي طايوق
تبقي منفوخ ابقي مطفوق
تبقي ويكه ابقي لايوق
تبقي شناق ابقي مشنوق
تبقي حراق ابقي محروق
وياسلام لو تبقي خازوق
مقلبيني
وزهجيني
وعكريني
ومامهم
هي مقلبيني
بس مهم شوفت عيونك وابقي اي حاجه قريبه منك
تبقي حيطه ابقي طوبه
تبقي روسيا ابقي كوبا
تبقي جمباظ ابقي هوبا
تبقي غنمايه ابقي لوبه
تبقي فاطمه ابقي زوبه
ابقي راس هي تبقي قوبه
الميني
وعوريني
وبشتنيني
وزهجيني
ومامهم
هي عوريني
بس مهم شوفت عيونك وابقي اي حاجه قريبه منك
تبقي سكر ابقي ضبان
تبقي بوليس ابقي بمبان
تبقي كبده ابقي مصران
تبقي شيته ابقي طرزان
ابقي حفله وتبقي سكران
فرتقيني
وجهجهيني
وبهدليني
ومامهم
هي فرتقيني
بس مهم شوفت عيونك وابقي اي حاجه قريبه منك
قالو زعلانه واظنك
قالو قرفانه واظنك
ماكي عارفه سؤالي عنك
يااااااااااااا اللزيزه الكلكي جنك
عايز اكون انا ابقي منك اي حاجه قريبه منك
اي حاجه قريبه منك
اي حاجه قريبه منك
اي حاجه قريبه منك

آاااه على قلبي
وعلى أملا حملته دهور
قطعت بحور
سواد الليل علي ليلين
صبرت كتير
و يادي النور

يا قطعة البلور
ويا رنة الطنبور
ويا سكر بنات الحور
ويا قصبة جروف أهلي
و يا رنة الطنبور
عليك اسم الله يا حاني
علي ما تجور

شفتك يوم عجبتيني
و قلت أقول
أنا الفي أولى داير أخطب؟؟
دا ما معقول
بقيت ساكت

فرحان بيك
أحدث زول و أدس من زول
و ماااا حبا أصيل و عريق
لف و دار عليهو الحول
لكن صحيح
الدنيا ما بتصفى و تروق لي زول

كربتو المعاك.. محلول
أتقدم و أتراجع و أتردد
لاااامن حصل محصول
إتمحن.. وقف
سكر مدلول
و قلبو المجرح بالملح مسلول

يا اللينة
يا شتلة فريع البان
ويا أملا بنيتو عليك..
وعشت زمان
أفكر فيهو لامن بان

بقيت للحسرة و الأهات
يا درة دامر المجذوب
ويا زينة الطالبات
و يا أمل السنين الفات
و يا طفلي الرضيع المات
إتحسرت و إتبهدلت ما خليت
ودمع نزل
وقت قات لي.. أووووه

طوعني الدكتور عشا البايتات
وعاد خطبوك لي زولا عريض و كبير
وعجنو كتير
و لابس ليهو نضارات
عربتو تسوي حي وا ليل
و حافظ الدنيا في راسو
وحاكي أشنابو نصطربات
دا عاد شغال و باني البيت
رضيتي بيهو طوالي
و ما قتيلو
Ooooh Too late
بعد الحصل
قالت لي يا مولانا
أدعو لينا معاك
يجازيك الله يا فلانة
زماني و فات
و دايراني
أجيب إبريقي و أتوضأ ؟؟
و أفرش الفروة و أتمكن
و أصنقر ليك للدعوات ؟؟
و تقول لي أدعو لينا معاك ؟؟
زمان ما كنت بدعو ليك
و أفكر فيك
لكن الليلة بدعو عليك
بركة البغدادي و الجابر
و كيتا فيك يا فلانة
أبوك لا يرضى لا يخاطر
ومما تجيبي سيرة الخطبة في خشمك
يعاين ليك يحمر فيك
و يجيب كرباجو و يتكرب
يمسكك من طريف التوب
طرفو طوييييييل ما بيمسك العرقوب
و أمك عاد تقول حي ووب
و تتعارض
تجمل باللي يا أبو فلان
و يقول ليها يا فلانة
كان عارضتي طلقانة
تقول لا لا
خليتك
براك زعلان
و تقعد تك
و يجرك كر على الديوان
و تصرخي جااااك بلا خجلة
التقول شيطان
لامن يسمعوا الجيران
ينطوا الحيط و يدقوا الباب
و يتطانش تقول طرشان
يكسروا الباب و يدخلوا عليه
و يقول ليهم حلفت يمين
اليصلني قريب هدي السكين
يزحوا بعيييييد
يختوا الخمسة في الإتنين
و تسمع جيت و تسمع واي
و يابا كفاي عليك الله
و تسمع جو و تسمع حي
و حي حي حي.. و حي حي ووب
و تسمع جيت و تسمع واي
و يابا كفاي
و تسمع جو و تسمع حي
و حي حي ووب
و تسمع جيت و تسمع واي
و تسمع جيت و تسمع حي
و تسمع جيت و تسمع جو
دميعاتك يصبن جو
و أمك برة تنبح هو
و وقت ينقطع صوتك و تفتري تب
يشد الباب يقفلك رب
إن لفيتي
مركوبو يقوم فيك كب
و يكنكش فيك و يمسكك طب
و يكفتك تاااااخ
و يخنقك خنقة بت الكلب

جني وجن
---------
جني وجن المسؤول المتسيب وعامل فيها حازم
وجني وجن المجاملات الما ليها لازم

جني وجن الونسه في المطاعم
وجني وجن معاكسة الجنس الناعم

جني وجن عبارة شغلك نضيف
وجني وجن البقول ليك نحن كدا وانتو كيف

وجني وجن الشافع البشحد الضيف
وجني وجن الحرامي وعامل فيها شريف

[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذا الرابط]

حاجات زي الدعايه في نص المسلسل
زوجه بوبوباره تبيع دهبها عشان تشتري هاتف محمول ..
شارع فيهو سته مجانين وعشرين مسطول .
.شافع سعودي يناديك اااي يازول..
.حريم يلبسو مراكيب رجال يلبسو دكتور شول

حاجات تنجنن البقر [ندعوك للتسجيل في المنتدى أو التعريف بنفسك لمعاينة هذه الصورة]
----------------
مغترب يقول ليك العود احمد
وزوجه تقول ليك لو ما لقيت شغل اشحد
وجار اي مشكله في بيتو يسوقك تشهد

حاجات تخليك منظراتي
---------------------
لاعب كوره يومو كلو قاعد في ضل النيمه
واداره ما عندها غير الخساسه والنميمه
ومدرب يلعب بالخطط القديمه
ولعيبه يرقصو بعد الهزيمه

دي الجرادة القاعدة بترضع في ولد الكديسة
صاحبة الديك والجدادة الحايمة بتكوس في المريسة
والضبانة الزغردت فرحانة بي جيت عريسها
والضب الخاتي سفة يشكي من الظروف العويصة
احييييييييييييييييييييييي انا

ــــــــــــــــــــــــــــــــــــــــــــــــــ ـــــــــــــــــــ

دا البمبر قال مصدع من قعاد طول النهار
و فردتو المفراكة تبكي وتشكي من طول الدوار
و الملاح حارقاهو شطة صاري قال ما عاوز هزار
والرغيف فقران وناشف من صف النتظار
و جكسويتي قالت انا ما بغازلها ركبت وش حمار
عاوزاني تحت البلوكنة ليل ونهار
على بالها روميو قالت سيد الرجال
ابيت زعلت تاني ركبت وش حمار
فكيتها الزيها راقدين كتار

ــــــــــــــــــــــــــــــــــــــــــــــــــ ـــــــــــــــ
تقولي لي جفيتك
تقولي لي عفصتك
بعفصك وبعفص حنانك
دبايب وعقارب تداعب بنانك
بتسال عن حالك
وكيفن هو حالك
سالت تمرجي البطاطس ببعادي
تجاهل وقبل لغادي
بحبك لمن بغادي
وبعاتبك بلغة سواقين التكاسي
حبيب مال انا ليش هذا عذاب
حبيب انت في كذاب
انت قول في حب واجد بعدين سوي غير نمونا
انت كنسل حب مالي
انت خرب كل حالي
شنو؟؟؟؟؟
ما عاجبك
ياخيييي ديشك
وديش الحب الخلاني سجينك
وديش الشوق البربط بيني وبينك

ــــــــــــــــــــــــــــــــــــــــــــــــــ ــــــــــــ

قصيدة بعنوان ليه طلقت الولية

شكيتي وبكيتي وقلتي عاوزة موبايل
مشيت وجريت وجبت ليك ستاير
ستاير ومرايل ودواير على قافية موبايل
اوع يا ولية اسمع منك قوايل
حردتي واعترضتي وقلتي ابوكي شيخ قبايل
طيب طالق بالتلاتة ولو في رابعة انا كنت قايل
بس ما عاوزين نعقد المسائل
شوفي احسن الموبايل ولا الستاير

عواسة في بلاد الغربة
ارجوك يا اماه يا محبوبتي....
لا تهبشيها عصيدتي....
مدي الي بمقبض المفراك...
و حبيبة من ويكة مدقوقة ...
في الفندك...
ارجوك يا اماه يامحبوبتي...
ان مرة جاءؤا اليك وخبروك ....
بأنني...انا حامل للحلة..
لا تجزعي...لا تجزعي...
بل زغردي....بل كبري...وتهللي....
ماذا اعوس هنا في غربتي...
غير العصيدة...وملاح الويكة...
فالبوش غالي والرغيف قليل...
اماه ان اخبرتك لا تحزني....
اني اعيش هنا في حالة من دبرسة...
عارفاني اني لا اطيق التربسة ..
اني اميل الي حياة الفرفشة والدردشة...
او تذكرين عزيزتي اني ....
احب الركلسة...
اقضي حياتي متكلا اتونس...
اليوم افرك ويكتي وعصيدتي...
في حلتي...
واذا الغبار احل يوما ضيفنا ..
فلغرفتي سأنضف..وأكنس...
عفوا انا ما كنت يوما ...
ربة للمنزل ...
لكننا في ابحراز سنفعل...
سنعوس رغم المستحيل ....
وسنأكل العدس المدنكل ..
بعد ان تمسي الوكائك ..
في الفطور مسيخة...
وندكه في الصحن بوشا...
بعد ان يضحي الرغيف قليل...
اماه كم اشتاق...
بل متشوق...لطبيخك...
فهنا مللنا اكلنا للويكة ..
انّا اذا غيرنا اكلنا للاحسن...
لاتحسبيها للافضل..
فعصيدة منها اليها سكر..
ان كان يوم العيد فيه نحرنا...
سيكون فيه خروفنا...
عصيدة باللبن ...
اماه كم اشتاق كم للشاي...
شاي الصباح مدنكلا باللبن...
فهنا تعزز..واستفز ظروفنا..
في الغربة...
والكل يعلم حالنا بالفلس...
واذا استلمت الراية ...
من اشرف..او سامي...
او زاهر وعجوبة او غازي...
لا تجزعي لا تحزني...
انا هنا في جنة الفردوس...
انا سلكنا دربنا للزحف...
نحو شهادة ...
باكر اجيئك غانما...
ومحملا بشهادتي....
في علم صنع الويكة ...
اوشين ...علم عصائدي..
ومن ابحراز اجيئك ...
باكر انا بشهادتي..
اماه لا لاتحزني ...
لا تجزعي..
بل زغردي بل كبري و تهللي ....
هزي الي بمقبض المفراك...
باكر اجيئك غانما ومحملا بشهادتي ...
في علم صنع الويكة وزراعتي...
اماه لا لا تحزني لاتجزعي...

في درب الريد
كم شاققت واتفولحت كم غنيت
كم مقلبت كم ضحكت كم بكيت
وكنت الفارس المنصور
أنا الشبّكت خط العرض وخط الطول
أنا الهباش أنا النهاش
أنا الختري
أصيد الهاوي شاقي الجو
واصيد الأرضي والبحري
أنوع في مطايب الصيد
أصيد البحبى والبجـري
مخازن فُل نكات بالكوم
مهذبة للعفيف وعديـل
مكهربة للبحومو الليل
شباب ورياش ورقة ولين
وخفة دم وقلة دين
دموع تمساح
تبكي الزينة والقاسين
غزال الجـن
دون ما يدري قلبو يحن
أرمّي حبالي في دربو وأقيف قدام
أمثل دور حميل مسكين
ويبدأ سـلام وراهو كلام
وكيف الحال وكيف عاملين
سلام يا أجمل الحلوين
سلام يا ناس ويا أناناس
صباح الورد والياسمين
وتسمع هااي
وتسمع كييف
وهمسة شوق وكسرة عين
وبعد شوية بيتكم ويـن
وبعد أيام
وييييين ليك مدة مشتاقين
ومشتاقين توصل شوشو للسكين
ويجي الشاكوش
يصنف شوشو في الارشيـف
وتبدأ القصة في التكرار
وكل عويل بدايتو هزار
يزين للفراش النار
وهاك ياصيد وجاك ياصيد

وفي ذات يوم نسايمو تهب
مكندش بي دعاش الرب
طريت الصيد
وشالني الشوق على سكة جِـدَيْ الريل
مدردح ماني راجي دليل
مسلح بي الخفيف وتقيل
مدى النيران يصيب النملة
ويتصاعد يصيد الفيل
وقولة تيت
جات الصيدة وجه جديد
عيونا تقول صباح العيد
بسيماتا ... تضوي الثورة والحلفايا
تدي الباقي لي باريس
وناس الكبكبة السبقوني رقدو القش
عيون زاغت ، رجول خارت
قلوب وقفت ، رؤوس طارت
مدحرجة في درب تاجوج
وكت ما بعومو شن وداهم يتشابو ويصارعو الموج
وجيتك يا صباح العيد
أنا الهباش أنا النهاش أنا الختري
ويادوب ما بديت بالبسمة قبل أقدم أوراقي
صباح الورد ما تميتا
سحبت إيدا .. صرت عينا .. لفتت جيدا .. قالت ... بِـسْ
تبسي كديسة يا تاجوج
عاملة عيونك الحلوات
أنا اب شنبات تقول لي بِـسْ
كما كُنتْ .. انسحاب تكتيكي لو ينفع
كحلت يمين لقيت شامتين
كحلت شمال لقيت وِسوِسْ
ومن يوم داك حردت الصيد
محل ما أقبِّـل أسمع ... بِـسْ

» ♥موسوعة عبارات ترحيبية♥
» ♥موسوعة عبارات ترحيبية♥